ഇന്‍ഫര്‍മാറ്റിക്സ് ഒളിമ്പ്യാഡ് 2010

2010-ലെ അന്താരാഷ്ട്ര ഇന്‍ഫര്‍മാറ്റിക്സ് ഒളിമ്പ്യാഡിനുള്ള (IOI) ഇന്ത്യന്‍ ടീമിനെ പ്രഖ്യാപിച്ചു. ടീമംഗങ്ങള്‍ ഇവരാണ് :
1. കേശവ് ധന്ധാനിയ (ലക്ഷ്മീപഥ് സിന്‍ഘാനിയ അക്കാദമി, കൊല്‍കത്ത)
2. അര്‍ച്ചിത് കരണ്ടികര്‍ (ജോഗ് ജൂനിയര്‍ കോളേജ്, പൂനെ)
3. അനീഷ് ശങ്കര്‍ (പി.എസ്.ബി.ബി. സീനിയര്‍ സെകന്ററി സ്കൂള്‍, ചെന്നൈ)
4. സിദ്ധാര്‍ത്ഥ് കെ (റിഷി വാലി സ്കൂള്‍, മദനപള്ളി)

Continue reading ഇന്‍ഫര്‍മാറ്റിക്സ് ഒളിമ്പ്യാഡ് 2010

ഉറുമ്പിന്‍കൂട്ടം

ഞാനൊന്നുറങ്ങിയിട്ട് എത്രയോ നാളായി

എന്നും
ലോകം ഇരുട്ടില്‍ മുങ്ങുന്നതിനുമുമ്പുതന്നെ
ഇരമ്പങ്ങളെയെല്ലാം മുറിക്കുപുറത്താക്കി വാതിലടച്ച്
മൃദുവായ മെത്തയിലേക്കുവീണ്
രാവിന്റെ തണുത്ത കമ്പളം ഞാന്‍ പുതയ്ക്കും
Continue reading ഉറുമ്പിന്‍കൂട്ടം

നീതിദേവത

കാത്തിരിക്കാനാവശ്യപ്പെട്ട്
അര്‍ദ്ധരാത്രിക്ക് പിരിഞ്ഞുപോയവര്‍
ഒരു യുഗം കഴിഞ്ഞ് തിരിച്ചെത്തി
വിഷം നിറഞ്ഞ എന്റെ
എല്ലുകള്‍ തോണ്ടിയെടുത്തു

ഉറങ്ങിക്കിടക്കുകയായിരുന്ന എന്നെ
മുഖത്തെന്തോ കുടഞ്ഞുണര്‍ത്തി
ശ്വസിക്കാന്‍ പണിപ്പെട്ട്
ഉള്ളും പുറവും നീറി
ഞാന്‍ എഴുന്നേറ്റുനിന്നു

വികലമായ കൈകള്‍ കൊണ്ട്
പൊള്ളുന്ന സൂര്യനെ ഞാന്‍
കണ്ണില്‍ നിന്നകറ്റി
രക്ഷപ്പെടാന്‍ ശ്രമിക്കാഞ്ഞിട്ടും
അവരെന്നെ ചങ്ങലയ്ക്കിട്ടു

നാറുന്ന തെരുവുകളിലൂടെ വലിച്ചിഴച്ച്
മാറാലനിറഞ്ഞ ഒരു മുറിയിലേക്ക്
അവരെന്നെ കൊണ്ടുപോയി
ഇത്തിരിവെട്ടത്തില്‍ ഞാന്‍
എനിക്കുചുറ്റും മുഖങ്ങളെ പരതി

അവരെന്നെ സ്വതന്ത്രനാക്കി
മേലാകെ വെള്ളപൂശി
വെള്ളവസ്ത്രം ധരിപ്പിച്ചു
കൈകളില്‍ തുരുമ്പിച്ച ഒരു വാളും
ഒരു തുലാസും വെച്ചുതന്നു

പിന്നെയൊരു കറുത്ത തുണികൊണ്ട്
അവരെന്റെ കണ്ണുകള്‍ മൂടി
ഇപ്പോള്‍ വീണ്ടും വിഷപ്പുക മണക്കുന്നു
എനിക്കൊന്നും കാണാനാകുന്നില്ലല്ലോ
എന്തൊക്കെയാണ് ഇവിടെ നടക്കുന്നത്?

പിന്‍കുറിപ്പ് : ഞാനും എന്റെ കൂട്ടുകാരും ചേര്‍ന്ന് ഭോപാല്‍ വിഷയമാക്കി കവിതകളെഴുതി ഒരുമിച്ച് പ്രസിദ്ധീകരിക്കാന്‍ തീരുമാനിച്ചതിന്റെ ഭാഗമാണിത്. “സീരീസിലെ” മറ്റ് കവിതകള്‍ : പ്രവീണ്‍, നത (ഇംഗ്ലീഷാണ്). ഈ കവിതയെ ഭീകരമായി കൊന്ന് കൊലവിളിച്ച ഒരു തര്‍ജ്ജമ ഇവിടെക്കാണാം. കാവ്യയുടെയും ശ്രീജിത്തിന്റെയും പോസ്റ്റുകളും കാണുക.

ഡിസ്നിലാന്‍ഡ്

സ്വയം പ്ലാനുണ്ടാക്കി എവിടേലും പോകാന്‍ കുറേ ദിവസമായി ശ്രമിക്കുന്നു. എട്ടുമണിക്ക് റെഡിയായി ഇന്നിടത്തേക്ക് പോകാം എന്ന് തലേന്ന് രാത്രി മൂന്നാളുംകൂടി തീരുമാനിച്ചുവെക്കും. എന്നിട്ട് ഒരാളെങ്കിലും പന്ത്രണ്ടുമണിവരെ ഉറങ്ങിക്കിടക്കും. പരസ്പരമുള്ള കുറ്റപ്പെടുത്തലുകളും  മൈനാകിന്റെ ധര്‍മ്മരോഷവും എന്റെ ഡോണ്ട് കെയറുകളും രാഘവിന്റെ കുളിയും (ഇംഗ്ലീഷിലാണെങ്കില്‍ BATH എന്ന് കാപ്പിറ്റലിലെഴുതണ്ട ടൈപ്പ് സാധനാണ്) കഴിയുമ്പഴേക്ക് രണ്ടുമണിയായി എന്നു കാണുന്നതോടെ പ്ലാനൊക്കെ ഷെല്‍വ് ചെയ്ത് മൂന്നാളും ഒത്തൊരുമയോടെ ലഞ്ചടിച്ച് പിന്നേം ഉറങ്ങാന്‍ കിടക്കും.

ഈ ചാക്രികപ്രതിഭാസത്തില്‍ നിന്ന് പുറത്തുകടക്കാന്‍ ബാഹ്യമായ ഉല്‍പ്രേരകത്തിന്റെ സഹായം കൂടിയേ തീരൂ (ദേ പിന്നേം വിക്കിപീഡിയ ഭാഷ വരാന്‍ തുടങ്ങി) എന്ന് മനസ്സിലായതുകൊണ്ടാണ് കൂടെ ഒരാളെക്കൂടി കൂട്ടി പ്ലാനുണ്ടാക്കാന്‍ തീരുമാനിച്ചത്. Subhonmesh Bose ആണ് കക്ഷി (ബംഗാളി പേര് മൊത്തമായി മലയാളത്തിലാക്കി നാറാന്‍ മനസ്സില്ല. ബോസ് എന്നേ ഞാന്‍ വാതുറന്ന് വിളിക്കാറുള്ളൂ). ഐഐടിയില്‍ ഞങ്ങളുടെയൊക്കെ സീനിയറായിരുന്നു. ഒരു തവണ ഐഐടിയില്‍ നടന്ന ടെക് ഒളിമ്പ്യാഡില്‍ എന്റെ പാര്‍ട്ണറായിരുന്നതുകൊണ്ട് നമ്മള്‍ തമ്മില്‍ പരിചയവുമുണ്ട്. ദസ്സയും ഡയറക്ടേഴ്സ് ഗോള്‍ഡ് മെഡല്‍ ജേതാവുമൊക്കെയായിരുന്ന വലിയ പുള്ളിയാണ്. ഒരു വര്‍ഷമായി ഇവിടെ ഇലക്ട്രിക്കല്‍ എഞ്ചിനീയറിംഗില്‍ പിഎച്ച്ഡി ചെയ്യുകയാണ്. മുമ്പ് സര്‍ജ് പ്രോഗ്രാമിനും കാല്‍ടെക്കില്‍ വന്നിട്ടുണ്ടായിരുന്നു. ഇത്രയും കാലമായിട്ടും ഡിസ്നിലാന്‍ഡ് കണ്ടിട്ടില്ലാത്തതിനാല്‍ ബോസ് കൂടെവരാമെന്ന് സമ്മതിച്ചു.

Continue reading ഡിസ്നിലാന്‍ഡ്

ക്വിസ്സിങ്ങ് പുരാണം

ഈ ആഴ്ച വളരെ എഞ്ചോയബിള്‍ ആയിരുന്നു. ഉറക്കം, ജേണല്‍ വായന, ഉറക്കം, ബ്ലോഗുവായന (പ്രധാനമായും കാഫില, സിദ്ധാര്‍ത്ഥ് വരദരാജന്റെ ബ്ലോഗ്), ഉറക്കം, എഴുത്ത്, ഉറക്കം എന്നിവയായിരുന്നു പ്രധാന പണികള്‍. ഇന്നുച്ചക്ക് സൂപ്ലാന്റേഷനില്‍ കേറി ഒമ്പത് ഡോളറിന്റെ ഓള്‍ യൂ കാന്‍ ഈറ്റ് ബുഫേയെടുത്ത് ഇന്ത്യക്കാരെ മൊത്തം നാണം കെടുത്തുന്നവിധം വെട്ടിവിഴുങ്ങി ഒടുവില്‍ ബോധം കെട്ടുറങ്ങിയതാണ് ആകെ ചെയ്ത വീരകൃത്യം (സ്കൂളില്‍ വച്ച് എന്നെ പരിചയമുള്ളവര്‍ക്ക് വിശ്വസിക്കാന്‍ പ്രയാസം കാണും. ഐഐടിയില്‍ ചെന്നശേഷം ഭക്ഷണത്തോടുള്ള ആറ്റിറ്റ്യൂഡ് മാറി. സംശയമുണ്ടെങ്കില്‍ ചൈന ടൗണില്‍ നിന്ന് ഒരു ചാക്ക് ഭക്ഷണം വാങ്ങി ഒറ്റ സിറ്റിങ്ങില്‍ തിന്നുതീര്‍ക്കാന്‍ എന്റെകൂടെയുണ്ടാകുന്ന ഐഐടി സുഹൃത്തുക്കളോട് ചോദിച്ചുനോക്കൂ). ആ, ഏതായാലും നാളെ ഡിസ്നിലാന്റില്‍ പോയി വീക്കെന്‍ഡെങ്കിലും മൊതലാക്കണം.

അപ്പോള്‍ എഴുതാന്‍ വിഷയദാരിദ്ര്യമുണ്ട്. എങ്കിലും സമ്മതിച്ചുതരാന്‍ മനസ്സില്ല. അതുകൊണ്ട് ഇങ്ങനത്തെ അവസരങ്ങളില്‍ സാധാരണ ചെയ്യുന്നപോലെ ചിതലരിച്ച് നാശമാകാറായ ഓര്‍മ്മകള്‍ പൊടിതട്ടിയെടുക്കുന്നു.

Continue reading ക്വിസ്സിങ്ങ് പുരാണം

ഇരുട്ടിന്റെ രണ്ടുതുള്ളി

നക്ഷത്രങ്ങളില്‍ നിന്നുതിര്‍ന്ന്

അഴുക്കുനിറഞ്ഞ മൂലകളില്‍ നിന്ന്
പൊടിതട്ടിയെടുക്കുമ്പോള്‍
വേദനിച്ച്

തുരുമ്പിച്ച ചങ്ങലക്കണ്ണികള്‍ക്കിടയിലൂടെ
നിശ്ശബ്ദമായി ഒലിക്കുമ്പോള്‍
പുഞ്ചിരിച്ച്

വഴിയോരത്ത് പാതി ചാരിയ
വാതിലിനുള്ളില്‍ ഒളിഞ്ഞിരിക്കുന്നവരെ
അവഗണിച്ച്

പിന്നിട്ട വഴികളില്‍ ഉപ്പുവിതറി
ഓരോ മണ്‍തരിയെയും കരയിച്ച്
ചിരിപ്പിച്ച്

ഒടുവില്‍ ശൂന്യതയിലെങ്ങോ അമരാനൊരുങ്ങവേ
മടക്കമില്ലാത്ത ആഴങ്ങളിലേക്ക്
ഇറ്റുവീഴുന്നു

ഇരുട്ടിന്റെ രണ്ടുതുള്ളി

സ്ലാം ബുക്ക്

പാതിരയാകാറായി, എഴുതിക്കഴിയുമ്പഴേക്ക് എന്തായാലും ആകും. പക്ഷെ ഉറക്കം വരുന്നില്ല. ഹെവി ആകും എന്ന് വിശ്വാസമുള്ള ഒരു വര്‍ക്കിങ്ങ് വീക്ക് മുന്നില്‍ കിടക്കുന്നു. ഇരുണ്ട പേപ്പറുകളിലേക്കും ഇക്വേഷനുകളിലേക്കും ഊളിയിടുന്നതിനുമുമ്പ്, അമേരിക്കയിലേക്ക് വന്നത് ബ്ലോഗെഴുതാനും തെണ്ടിത്തിരിയാനും സര്‍ഫ് ചെയ്യാനുമാണെന്നുള്ള പോപ്പുലര്‍ ഒപീനിയന്‍ (കടപ്പാട് : അനൂപന്‍, അദീബ, മുനീര്‍) ഒന്നുകൂടി ഊട്ടിയുറപ്പിക്കാന്‍ ഒരു പോസ്റ്റാകാമെന്ന് വച്ചു.

കാവ്യയുടെ പോസ്റ്റ് കണ്ടപ്പോള്‍ ഓര്‍മ്മ വന്നതാണ്. വിദ്യാലയജീവിതത്തിന്റെ അവസാനദിനങ്ങള്‍. വര്‍ഷങ്ങള്‍ ഒരുമിച്ചുപഠിച്ച കൂട്ടുകാരോട് വിടപറയുന്ന കാലം – സ്ലാം ബുക്കുകളുടെ കാലം.

Continue reading സ്ലാം ബുക്ക്